LOA

LOA

Votre média alternatif


Koz sanm la mèr [Fonnkèr Cathy Singainy]

Publié par Cathy Singainy sur 10 Octobre 2019, 21:10pm

Catégories : #art, #culture

 

 

Koz  sanm la Mér 

Granmatin lévé rinse mon goziyé 
Lansive la souflé
Larg  mon sové  poz mon savat  si koté 
Désann  la mér  avan  soléy  lévé 
Done  dolo  sakouy  flèr  kann  
Na fé kabar 
Mamour mon gayar  
Dann  mon zoubik détrwa mo si papiyé 
Sa la pa ninportkwé sa mon krimandé 
Mon doulèr ékri  mi sa dépozé 
Dann  vant la mér 
Trinn  pi boulé  pasé  
Alourdi  pa mon paké 
Pétal  flèr  gréné 
Akonpay  mon pansé 
In morso  kanf  alimé pozé  si galé 

Vodrémiyé  mi paktiz  sanm  Bondié 
Vodrémiyé mi paktiz  sanm La Mèr 
Vodrémiyé mi paktiz sanm Linivèr

Mon  fonnkér granmatin bonér 
An sokré  dévid mon kér

Sét  lam la mèr aval  mon doulér 
Sét lam  la mér déroul  out  rob
Out  zoli  rob  blé  lindigo  zinmrod 
Kador  amwin anvlop  mon kor 
Sét lam  la mér désine  si mon do 
Mon bouklié  zékay  lor 
Mon sér  la Sirinn fé out shanté 
Fé konét  la rinn  dolo  lakordé 
Mi vé pa vann  mon lam  lo diab

Mon  rase  lé korias 
Ladi  ti ash  koup  gro bwa 
Koud  sab  mon lidantité  konm  ti vé 
Noulé pa kapon  nou va lévé 
Ek  mové zérb  nou fi  tisane 
Nou apèl  sa vitamine  la pay 
Mon lafrodésandansité  mon zétwal 
Mon fikir  kaf mon léritaz  anséstral
Mwin lé kapab  port  mon fanal 
An kourone magéstral 
Parkoud  vaval  lamour  mizikal 
Zarlor  si lo por mon kér  an zakor 

Cathy Singainy

Pour être informé des derniers articles, inscrivez vous :

Commenter cet article

Archives

Nous sommes sociaux !

Articles récents