Mon langkozé lang mon gromèr [Fonnkèr Cathy Singainy]

Publié par Cathy Singainy sur 2 Octobre 2019, 22:45pm

Catégories : #art

Mon langkozé
Lang mon gromèr
Mon langkozé
Lang mon gromèr
Mon langkozé
Lang mon gromèr

Danse dann fonn mon kèr
Fénésans dann mon bous la dousèr
Zoli kozé konm fréshèr larozé
Mi aroz an ti gine dolo an ti gine dolé
Po done flèr an bouké marlé

Mon langkozé
Lang mon gromèr
Néna bonpé la koulèr
Palèt pintir lakwarèl
Mèt la min koloré
Lafé tablo réyoné
Nasyon kalité mélanzé
Linité sora nout fièrté
Po mon pèp lèv an dinité

Mon langkozé
Lang mon gromèr
Marmay rouvèr la port fénèt
Léss rantré bon désord bon lodèr
Nout kiltir réyonèzté
Tap mon kokiyaz po fé konét

Mon langkozé
Lang mon gromèr
Lé zoli lé zouli minm
Ankor pli anbéli
Lèr Divapali
Kanf oulpati
Mi mèt mon sari
Po dépoz ti lanp la vi
Maa Laskmi
Om Shanti shanti shanti
Om
Fane Lamour an konféti

Mon langkozé
Lang mon gromèr
Lé dou lé dou an doumiyèl
La fèt misilman
La Line done konsantman
Plato nèv ranpli bonbon fondan
Manz an frèr sèr
Lo kèr kontan

Mon langkozé
Lang mon gromèr
Li lé lib vol an lèr
Mèt an lèr
Konm linz
Mon bann fami komor
Rouvèr an kordalinz
Partou déor

Mon langkozé
Lang mon gromèr
Lé for li bril li pwak pwak
An doufé la brèz
Sak i pran pèr
Bous zot zorèy
Po la fèt sinwa
Grinn in tralé pétar
Ziska tar lo swar
Tir la sias
Fé kour bébèt
Démon nwar
Walala gran dragon larivé
Bat la min po la viktwar

Mon langkozé
Lang mon gromèr
Lé plin langaz lèspri Malougasé Makwalé
Drapé an linz lanmba
Mi sava mi sava mi sava
Danse dann la foré
Tir sagay fé priyèr
Po la Tèr

Fèt kaf
Malouya atèr
Lamour Mémwar
Lonèr Réspé po zansèt
Maloyèr Fonnkézèr Moringèr
Kivi Maronèr
Bob pikèr kayanm sati roulèr
Tisane nout kèr
Po bonèr la Vi
Nou tyinbo lansor
Po somin galizé
Zoli bouké korbèydor
An boutyr
Bann gramoun zarboutan
La kado anou
Kinm zot la fine alé

Mon langkozé
Lang mon gromèr
Lé ron konm la Line
An limiyèr
Po béni bann fanm
An vwa'd fami
Zoli somans
Ines Nilia
Baba kado la Vi

Mon langkozé
Lang mon gromèr
Li lé vivan vivan minm
Li lé pa mizèr
Fé pa gro kèr
Ral pa lo kèr
Anou minm zanfan
Bonkèr

Mon langkozé
Lang mon gromèr
Son lorizine lé multisours
So dolo va koulé
Va koulé va koulé
Partou an grin trinn
Vwal lamariyé

Mon langkozé
Lang mon gromèr
Danse dann fonn mon kèr
Mamour ali
Viv ali
Respir ali
Koz ali
Malouya ali
Shant danse ali
Zistwar ali
Fonnkèr ali
Souri ali
Partaz ali liber ali
Mèt pi také si mon kozé

Mon langkozé
Lang nout gromèr
Lang Lamour

FanmKerMaron
Cathy Singainy